PAPUA Niugini Futbal Asosiesen PNGFA  i bin kisim nupela kar ki long han bilong Sels Menesa bilong Ela Motors Ligo Avgerae long Badili, Pot Mosbi.

Presiden  bilong PNGFA John Kapi Natto i bin go wantaim Kaunsel bilong PNGFA Dan Kakaraya na Jenerel Sekreteri bilong PNGFA Pius Lentenge long kisim ki wantaim.

Dispela em namba tu taim FIFA i bin baim kar bilong PNGFA long ranim wok bilong futbal insait long kantri aninit long lidasip bilong Presiden John Kapi Natto. 

Wankain samting i bin kamap long Lae tu, taim Ela Motors i bin givim wanpela kar ki long PNGFA Operesenel na Edukesen Opis long Lae long surukim wok bilong futbal.

Presiden bilong PNGFA John Kapi Natto i tok bikpela tenkyu long FIFA long sapot na baim dispela kar long sapotim ol wok bilong futbal long kantri.

Em i tok wantaim tingting bilong PNGFA long surukim wok bilong futbal, dispela ol kar bai ken helpim ol opisal long travol go antap long Hailens na ol arapela ples long apim wok bilong ol.

Aninit long K700, 000 mani bilong FIFA na PNGFA i bin baim 7-pela kar bilong Pot Mosbi (Hetkwata) opis, Lae na Kimbe.

Jenerel Sekreteri bilong PNGFA Pius Letenge i tok tenkyu long PNGFA Ekseketiv Komiti long visen bilong baim ol nupela kar bikos trenspot i kamap wanpela bilong ol bikpela hevi long karim aut futbal wok long kantri.

“Nau mipela i gat ol kar, dispela em bikepla samting long PNGFA opisa bai mekim wok bilong ol gut long kantri,” em i tok.

Mista Letenge i  askim ol wokmanmeri bilong em long yusim na was gut long ol kar gut bilong wanem wankain samting bai kamap long Hailens Rijon Teknikol Futbal skil long pinis bilong dispela year.