PAPUA Niugini Nesenel Wimen soka tim em ol kwin tru bilong Pasifik Gems bikos ol i winim gold medal faivpela taim olgeta long Pasifik Gems futbal tonamen na save apim tru nem bilong kantri bilong yumi.

Tasol dispela ol sempion soka meri bilong PNG i nogat lokal nem long soim ol ples klia olsem ol arapela spot.

PNG nesenel wimen soka tim em ol kwin bilong Pasifik Gems stat long 2003 yet i kam 2007, 2011, 2015 na 2019, na nau ol i holim yet taitel i stap.

Ol arapela spots tim olsem meri netbal tim em nem bilong ol PNG Pepes, na Kumuls em ragbi lig tim bilong ol man na Orchids em ragbi lig tim biong ol meri. Tim bilong ol man long spot bilong ragbi yunion em Pukpuks na tim bilong ol meri em Ragianas.

Ol dispela bikpela toktok long painim gutpela nem long givim long PNG wimens soka tim i bin kamap long Madang taim Wantok Niuspepa i bin bung wantaim ol foma nesenel soka pilaia husat i makim kantri long ol Pasifik Gems pinis. Ol dispela lain em Danny Gabong na Alfred Gabong, husat pikinini meri bilong em nau em straika bilong Genesis FC long Mosbi, na Yvonne Gabong, husat i stap tu long PNG wimen nesenel soka tim.

Ol dispela foma PNG intanesenel soka pilaia i tokaut olsem PNG Futbal Asosiesin aninit long gutpela lukaut bilong Presiden, John Kapi Natto i mas kamap wantaim wanpela gutpela lokal nem long givim long nesenel wimen soka tim bilong yumi.

Nau kosa bilong PNG nesenel wimen tim, Frederica Sakette i bin wanpela long ol meri husat i bin stap long PNG tim i winim gold medal long 2003 Fiji Gems.

Wantok Niuspepa  i bin askim Sakette long dispela na em i tokaut olsem wanpela nem ol pilaia na opisal long pastaim kamap wantaim em ‘Bilum’ na ol i givim i go long PNGFA,  tasol nogat konfemesen i kamap yet long putim dispela nem i kamaut ples klia yet.

PNG wimen soka tim i bin setim histori stret long Pasifik Kap long Tonga. Long 1998 PNG wimen soka tim i bin pilai long Osenia Kap na ol i kamap namba tri taim ol i rausim trausis bilong ol meri Fiji 7-0.

Bihain long faivpela yia olgeta we nogat intanesenel kompetisen, ol PNG wimen soka tim i kam bek strong gen aninit long kosa Francis Moyap. Dispela i stat long 2003 long Osenia Kap long Australia. Ol meri PNG i kamap namba tri long dispela taim bihain long ol i wilwilim ol Cook Islands 5-1 na kilim lam bilong ol Samoa 5-2.

Long 2003 yet PNG wimen soka tim i bin pilai long namba wan Saut Pasifik Gems futbal tonamen long Fiji long mun Jun na Julai. Long namba wan gem bilong ol PNG i bagarapim stret sindaun bilong Kiribati 13-0 long skoa. Long dispela tonamen tu i lukim PNG i go pas tru long poin na ol gems ogenaisa i luksave na givim gold medal long PNG.

James G. Kila i raitim