HOPE CUP salens i bin kamap namel long tupela Mendi tim wantaim Pot Mosbi Vipers na Lagatois long las wik Sarere long Leit Joe Keviame Oval .

Dispela HOPE CUP salens i kamap bihainim tingting bilong NCD Gavana Powes Parkop na Gavana bilong SHP William Powi long lukim salens namel long tupela intasiti tim PRK Mendi Muruks na POM Vipers bikos dispela i ken helpim tupela klap long selektim ol pilaia bilong 2021 Digicel Kap kompetisen.

Gavana bilong NCD Powes Parkop i gat bikpela tingting long divelopim ol yangpela talen pilaia insait long HOPE CUP tasol neming rait sponsa bilong PRK Mendi Muruks i bin tok no gat long dispela salens olsem ol i bin pulim taitim inap las wik.

Maski ol PRK Mendi Muruks klap i no bin pilai tasol tupela Mendi tim i bin sanap long salensim tupela tim bilong Mosbi. Mendi Tim wan salensim Vipers na tim tu salensim Lagatois.

Mendi tim tu i bin daunim Lagatois wantaim 10-8, na tim wan i bin dro wantaim Vipers inap Vipers skorim trai insait long narapela 5 miniti bihain long fultaim na dispela i mekim ol winim Mendi wan tim 4-0.

Ol pilaia bilong tupela Mendi tim i bin soim Provins na pipel olsem, ol i gat nupela talen pilaia i ken sanap strong na karim nem bilong provins wankain olsem ol arapela.

Gavana Parkop i tok dispela HOPE CUP salens em bilong kamapim bel isi, yuniti na bungim Sauten Hailens Provins wantaim ol pipel long sanap strong na daunim ol hevi bilong provins na komyuniti na tu long divelopim ol yangpela  manmeri.

Bihain long HOPE CUP salens olgeta pipel i bin amamas wantaim ol pilaia bilong Mosbi na Mendi wantaim. Olgeta pilaia i bin amamas long salens wantaim.

Jacklyn Kimala i raitim