WANPELA long distens rana husat i gat 35 krismas nau i laik difendim taitel bilong em long dispela
yia 2021.

Brenden Buka bilong Asaro long Isten Hailens Provins i tok em i gat bikpela bilip olsem em inap
winim ol asples Koiari rana gen.
I nogat wanpela rana bilong Kokoda Maraton resis i bin rausim foapela taim taitel rekod bilong em
long dispela resis aninit long sapot bilong Kokoda Treking Limited (KTL).
Long 2006, Buka i brukim 24 aua rekod bilong em i go daun long 19 haua long taim em i bin i gat 19
krismas.
Long 2017, em katim i go daun gen wantaim pesenel bes rekod long 18 aua na long 2010 em i
brukim rekod bilong em yet gen i go daun gen long 17 aua na i nogat wanpela rana i abrusim dispela
rekod yet.
Em i tok long 2012 em i no bin ran long dispela resis tasol nogat wanpela man i bin abrusim rekod
bilong em.
“Mi no bin ran bikos mi ting olsem bai wanpela rana i winim mi tasol rekod bilong mi i stap yet olsem
na mi laik mekim nupela rekod pastaim long mi ritaia.
Em i tok, “Maski mi gat krismas bilong mi i antap nau, mi fit na redi long ran olsem ol NRL pilaia i
save win pastaim long ol i ritaia wantaim gutpela rekod.”
Foma Sif Ekseketive Opisa bilong Kokoda Trek Atoriti (KTA) James Enage i sapotim Buka olsem em i
wanpela autstending rana na em yet i soim pinis long foapela taitel bilong em.
Buka i tok long taim bilong COVID-19 las yia, em i no bin ran resis bikos sampela ol maraton rana i
bin kam long Australia.
Buka i stap long Pot Mosbi na i redim em yet i stap na wetim ol ogenaisa i setim deit bilong
kompetisen.

Joseph Dawai i raitim