OL Kwinslan Helt Atoriti QHA i bin tokim ol SP PNG Hunters long surukim trevol taim
bilong ol long las wik Sande 14 Februeri 2021, long narapela 7-pela moa de.

Ekting CEO bilong PNGRFL Stanley Hondina i tokaut long leta bilong QHA i kam long
Kwinslan Ragbi Lig (QRL) olsem: “Long Kwinslan taim i gat positiv keis bilong COVID-19,
ol opisa bilong ol yet i save painim klostu lain bilong dispela keis na dairektim ol i go insait
long 14 de kwarentin na pinisim taim bilong COVID-19.”
Em i tok dispela leta i kam long QHA long Fraide 12 Februeri 2021: “Olgeta bai stap long 14
de kwarentin maski taim ol test bilong ol i negetiv.”
Hondina i tok dispela ansa i kam long las Fraide bihainim test bin kamap long Fonde long
bung wantaim pri-trevol kwarentin plen bilong ol negetiv pati bai trevol.
Em i tok wantaim dispela nupela dairektiv bilong QHA, ol SP PNG Hunters bai stap long
Kwarentin long narapela 7-pela moa de.
Ol i bin painimaut long wanpela positiv keis long Fraide 5 Februeri 2021, na dispela wanpela
i bin stap long aisolesen,” Hondina i tok. “QHA i toksave olsem ol pilaia na kosa
wokmanmeri i bin stap klostu wantaim dispela positiv keis olsem, na ol bai no inap trevol
long Kwinslan inap 14-pela de i pinis.”
Hondina i tok dispela i bagarapim plen bilong bilong ol, “mipela i mas na rispektim lo na
polisi bilong ol na kamap olsem gest long kantri bilong ol.
“Mipela i bin toktok wantaim QRL na DFAT, na mipela i bin surukim deit bilong trevol i go
long Sande Februeri 21, 2021 bihain long dispela 14 de kwarentin,” Hondina i tok.
Em i tok Praim Minista James Marape na olgeta ki stekholda i bin harim dispela toksave
pinis.
Kosa bilong SP PNG Hunters Mathew Church i tok dispela helt na seifti bilong olgeta i stap
long PNG na Kwinslan wantaim.
Em i tok ol pilaia na wokmanmeri i laik go long Kwinslan na pinisim pri-sisen trening bilong
ol.
“Dispela i surukim program bilong mipela tasol mipela i luk fowat yet long wanem samting
mipela i ken kontrol,” Church i tok.