POT Mosbi Vipers i putim bikpela lek mak long trael mets bilong ol wantaim Sauten Blacks
na Lagatois long Justin Tkatchenko Stedium long Kaugere las wik Sande.

POM Vipers i gat bikpela tingting long divelopim skil na talen bilong olgeta nupela pilaia
husat i bin joinim skwat long dispela 2021 sisen. Na dispela i save kamap long taim bilong
Gavana Salens we i bin kamap wantaim Gavana Powes Parkop na ol arapela bikpela opisal
long Kaugere Stedium.
Operesen Menesa bilong Mosbi Saut Lig Bagelo Solien i tok planti pilaia bilong Sauten
Black tim i kam long Mosbi Sauts Lig na sampela long Gavana Kap long salensim tupela tim
bilong NCDC Vipers long dispela Gavana Salens.
Em i tok dispela Sauten Black tim em bilong olgeta Mosbi Saut lig pilaia wantaim ol sampela
bilong Gavana Kap lig olsem na nau ol luk fowat long neks yia 2022 intasiti sisen wantaim
olsem ol arapela klap.
Wankain long ol Lagatois tim bilong NCDC we i bin laik joinim dispela 2021 sisen tasol
Aplikesen bilong ol i nidim sampela moa samting long inapim standet bilong Digicel Kap
kompetisen.
“Mipela i amamas long Gavana Salens long dispela nupela JT Stedium na tu Gavana Parkop i
stap na kik statim dipela bikpela trael resis,” Solien i tok.
Wanpela gem bilong ol meri i bin opim tupela gem bilong ol man, namel long Tim wan
bilong POM Vipers wantaim Lagatois na bihain Tim tu bilong Vipers wantaim Sauten
Blacks.
Olgeta gem i bin kamap gut insait long JT Stedium olsem na bikpela tenkyu long bikpela han
mak bilong Mosbi Saut Memba Justin Tkatchenko na olgeta sapota long holim gutpela trael
mets.
Dispela i soim bikpela lek mak bilong Vipers i bin setim na tu ol luk fowat long narapela
Gavana Salens bai kamap long Mendi Sauten Hailens o Rabaul bihain long ol kisim tok orait.

Jacklyn Kimala i raitim