PNG INTENESENEL straika bilong ol meri tim Megan Gunemba i bin tokaut olsem planti yangpela meri husat i stat pilai nau tasol long ol bikpela kompetisen i soim gutpela gem na i ken muv i go antap moa yet sapos ol i gat gutpela disiplin.

Gunembahusat i go pas olsem kepten bilong Poro FC long Wimens Nesenel Soka Lig Iong 2020-2021 sisen i bin givim taim long tokaut long tingting bilong em wantaim Wantok Niuspepa long Madang.

Em i tok em luksave olsem planti ol yangpela meri i wok long soim gutpela gem nau long resis bilong Noten Konferens pilai, tasol ol i nidim moa trening na gutpela kosa long soim ol nupela stail bilong gem long nesenel level bilong kompetisen long muvim ol.

Moa long en tu Megan i tok ol meri i mas gat strongpela disiplin o strongpela tingting long pilai soka na no ken pundaun namel long rot na bihainim ol boi-fren o hangamap long ol pasin no gut we i ken stopim futbal wok bilongol.

Long las wiken Megan i bin go pas long Poro FC na i go het long skorim gol we i lukim tim bilong em i wil wilim stret Morobe Tulips 6-0.

Dispela meri Mumeng long Bulolo distrik, Morobe provins i kam long wanpela strongpela soka famili husat i gat biknem long NSL na PNG wantaim. Papa bilong em Peter Gunemba em namba wan kosa bilong sempian PNG tim Lae City Dwellers long pastaim. Tupela brata bilong em Raymond na Troy Gunemba i bin makim PNG long ol intenesenel pilai ovasis.

Gunemba i tok planti ol gutpela yangpela meri i wok long soim gutpela skil long pilai soka i stap long rurel ples o ol liklik senta. Save ol i gat em ol lokal talent na ol i bringim i kam insait long WNSL na i givim salens long ol olpela pilaia, tasol ol i nidim gutpela kosa long strongim gem bilong long go het long pilai soka.

Em i tok olsem wanpela tim we i soim lokal talent long kompetisen long dispela sisen em Sepik FC. Ol meri Sepik nau i ran namba tu long poin leda bilong Noten Konferens WNSL, na ol pretim tu ol arapela tim bilong bikpela soka senta olsem Lae na Madang.

James G. Kila i raitim