OL 12-pela olpela Frensais klap- Kroton Hela Wigmen, Lae Snax Tigers, Agmark Rabaul Gurias, Moni Plus Pot Mosbi Vipers, Wamp Nga Hagen Eagles, PRK Mendi Muruks, Kimbe Cutters, PRK Galp Isou, Bintangor Goroka Lahanis, EPG Mioks, GRL Central Dabaris na JPG Waghi Tumbes bai pilai gen long 2021 Digicel Kap Sisen.

Siaman bilong PNG Nesenel Ragbi Lig Kompetisen, Adrian Chow i tok ol i bin kisim 15 eplikesen bihain long taim ol eplikesen i pas long las Novemba.

“Namel long olgeta olpela klap, tripela nupela tim bai i no inap joinim 2021 sisen. Ol dispela tim em Motu Koita Lakatois, Simbu Warriors na Sepik Pride bikos ol i no bin inap rot bilong eplikesen,” Chow i tok.

 “Mipela i tingim hamas strong ol wokim long putim klap insait long 2021 Digicel Kap sisen,” em i tok. “Ol Bod i no les long eplikesen bilong ol. Tasol mipela i laik mekim olgeta rot bilong sapot i mas orait longpela taim na ol frenshais bai stap long kompetisen longpela taim.”

Em i bin tok klia long risen bilong aplikesen bilong ol i no orait long nau. “Ol Motu Koita Lakatois aplikesen i bin kisim gutpela sapot gen long kopret sponsa. Ol arapela sapota i ken bringim gutpela spot edministresen bilong hai stendet  na komesel luksave long kompetisen. Tasol aninit long lo bilong PNGNRLC long 2018, i bin tok orait long wanpela provins i mas gat wanpela frenshais,” Chow i tok. “

Em i tok PNG Ragbi Futbal Lig i gat pawa long tok orait long tupela o moa frensais long wanpela provins.

“Mipela bai go het long bihainim rot bilong konsaltesen wantaim ol stekholda bilong mipela long painim aut moa pastaim bihain  long tokim PNGRFL i mekim disisen na tok orait long eplikesen,” em i tok.

Chow i tok long eplikesen bilong Simbu Warriors, dispela nemimg rait sponsa bai no gat bikos em brukim rait bilong NRLCD pletnium sponsa bilong alkohol prodak. “Na tu, dispela plen bilong hom graun fil Dickson Oval i no stap orait long stendet bilong pilai.

Em i tok long eplikesen bilong ol Sepik Pride em i no bin orait bikos ol i no gat wanpela gutpela sponsasip leta bilong sapot, na tu i no gat ektiv lokal lig.

“Dispela aplikesen plen i no gat mani sapot long strongim ol long longpela taim,” Chow i tok.

“Ol lokal kompetisen i mas ektiv na wokim ples bilong ol pilaia long stap na trening.”

Em i tok dispela nupela PNGRFL gavanens straksa na sistem bilong lokal lig na skul i stat kamap olsem na ol i askim olgeta lig na skul long kantri i mas bihainim dispela afiliesen.

Em i tok dispela ol 4-pela frensais klap- Mt Hagen Eagles, Enga Mioks, Waghi Tumbe na Galp Isou- i mas pinisim rejistresen mani bilong 2020 sisen.

 “Salens bilong 2020 sisen i bin givim bikpela fainensel hevi long ol frenshais na sponsa bilong ol, na mipela surukim deit bilong rejistresen,” Chow i tok. “Tasol long strongim hai stendet bilong Digicel Kap Kompetisen, ol bos i bin stretim olsem ol frenshais i mas baim ap balens bilong 2020 long kwalifai long 2021 sisen.”

Chow i tok dispela 2021 Digicel Kap kompetisen bai stat long mun Epril.