GEREHU Off-sisen Ragbi Lig kompetisen i bin statim nomol kompetisen bilong ol gen long dispela yia bihain long 30 yia olgeta i no gat gem.

Bihain long COVID-19 las yia, Gerehu OFF-Sisen Lig kompetisen i kam bek wantaim 128 klap husat i bin rejista wantaim K500 na stat resis. Na las wik em namba 11 wik bilong raun we A-gret na B-gret tim bilong man i resis long maina primiasip.

Deputi Siaman na Futbal Operesen Menesa bilong Gerehu Off-sisen Ragbi Lig Bomai Ninkama i tok dispela sisen i bin bungim 128 klap olgeta rejista, 64 bilong A-gret na 64 bilong B-gret  we ol go insait long nok-auts pinis na kisim top 24 tim long resis bihain long go insait long fainel.

“Mipela i gat 3-pela moa wik long pilai gren fainel, olsem na mipela i kisim 16 tim bilong ol meri na Anda-20 long lukim interes bilong ol long ragbi bikos klostu taim bai mipela statim nomol Gerehu Sab-eb kompetisen,” Mista Ninkama i tok.

“Mipela tok bikpela tenkyu long meja sponsa Gavana bilong NCD Powes Parkop, kosponsa Vitis Indastri husat i kam long bod na sapotim dispela kompetisen na tu long olgeta klap, komyuniti, opisal na olgeta referi na lainsman long taim bilong gem,” em i tok.

“Mipela i no ranim dispela kompetisen nating tasol bikpela tingting bilong mipela em long divelopim na kamapim gutpela ragbi lig pilaia long bihain taim,” em i tok.

Ninkama i tok bikpela amamas long olgeta sapota husat i save kamap long sapotim wan wan klap bilong ol wantaim liklik rejistresen bihain long kisim fil na tu long lukim gem.

“Mipela olgeta i ranim kompetisen long apim wan wan nem bilong kompetisen na pilaia wantaim, long resis na soim kala o pasin bilong wan wan klap,” em i tok.

Dispela kain pasin bilong wan wan klap tasol i ken bringim pilaia bilong ol go antap long narapela mak bilong ragbi lig.

Jacklyn Kimala i raitim