OL CPL Grup i bin sponsa long K30,000 mani long sapotim ol Tim PNG Etlit husat i kwalifai long dispela yia Tokyo Olimpik Gems.

Dispela Olimpik Gems bai kamap long Julai 2021 we ol etlit bilong olgeta hap bilong Wol bai go resis.

PNG Olimpik Komiti i bin sapotim 29 etlit bilong 10-pela spot. Namel long ol, tupela bilong spot Seiling ol i kisim tupela spot long Tim PNG insait long Men’s Laser na Wimen’s Laser Radial bung.

Ol narapela etlit i stap yet long kwalifai stej na bai lukluk long winim Olimpik Gems driman taim kwalifikesen kompetisen i stat gen long 2021.

Ol etlits na kosa bilong ol i bin redi na trening strong long las mun. .Dispela sapot bilong CPL bai helping ol long na bringim ol i kam klostu long luksave long driman bilong ol.

Stap helti na no ken painim bagarap em wanpela ki fitnes bilong ol. Olgeta etlit i kam long narapela hap we sampela i ken sapotim ol yet wantaim wok o i gat gutpela famili sapot. Na sampela i no gat dispela ol sapot o gutpela kaikai long stap helti na fit long Tim PNG.

Dispela sponsasip bai sapotim ol etlit long baim kaikai na toilet pepa, sapotim welfea na helt na tu helpim ol long olgeta de laip bilong ol.

Sif Ekseketiv Opisa bilong CPL Grup Mista Navin Raju i bin tokaut long dispela patnasip long gutpela bilong spot olsem tul bilong divelopmen na givim sapot long PNG Etlits long intenesenel stej.

 “Mipela  i amamas long save olsem sponsa bilong mipela, i mekim bikpela senis i no long wan wan tasol divelopim gutpela etlit na spot long PNG”.

Jacklyn Kimala i raitim