GUTPELA gol bilong kepten na straika bilong Poro FC, Megan Gunemba i kilim i dai paia bilong Tusbab Laidamon na i  lukim Poro FC i ranawe wantaim 3-2 win long Wimens Nesenel Soka Lig pilai we i bin kamap long Laiwaden oval long Madang long las wik Sarere.

Dispela win bilong Poro FC long raun 9 bilong NWSL i lukim ol i go pas yet long NSL Noten Konferens.

Dispelapilai we i bin kamap long Laiwaden oval long Madang i bin kamap long gutpela taim stret we i lukim no gat strongpela hot san i lait, na planti ol manmeri i sanap na sindaun long gras long lukim gem.

Tusbab i bin namba wan long skorim gol we i lukim PNG intenesenel straika, Nicollete Ageva i kisim wanpela gutpela bal na i trikim ol beklain bilong Poro FC na hamarim stret bal i go insait long umben. Bihain dispela gol Poro i kam bek strong tru wantaim strongpela salens.Ol i mekim i go na straika bilong Poro FC Renate Samuel i skorim gol long kamapim 1-1 dro.

Bihain long gol bilong Renate, Poro i pilai strong na i muv i go insait long hap bilongTusbab planti taim na go bilong ol i givim sans long narapela intenesenel straika Megan Gunemba long pairapim umben bilongTusbab long bringim skoa igo antap 2-1.

Nicollete Ageva bilongTusbab Laidamon i pilai strong tru i go na ol midfilda i salim gutpela bal long em na em i pairapim gen namba tu gol bilong em long kamapim 2-2 dro. Dispela dro i bringim gem i go hap taim.

Long seken hap gem i bin go strong tru na ol sapotas long fil i ting olsemTusbab bai skorim gol bikos ol i pilai gut na planti taim em muv i go insait long hap bilongPoro FC.

Wanpela asua bilong wanpela beklain pilaia bilong salim bal i go bek long beklain pilaia bilongTusbab i popaia na i lukim resa meri straika na kepten bilong Poro FC  Megan Gunemba i kisim bal na i ran na i kikim strong tru i go insait long umben bilongTusbab.

Bihain long dispela gol i lukim tupela tim i pilai strong i go tasol difens o banis bilong tupela tim wantaim i strong na gem i go pinis wantaim Poro FC i winim  gem 3-2.

Gem long Laiwaden oval em mobail telefon kampani b-mobail aninit long 4G LTE i sponsa na tu i givim sans long ol manmeri long Madang long kisim fri SIM kad taim ol i soim ID kad bilong ol.

Gem long Madang long las wikSarere i lukim tu stap bilong Menesa bilong NSL, Stanley Khanna i stap long lukim pilai.

Win bilongPoro FC long las wiken i mekim ol i surik i go antap long poin lada bilong Noten Koferens WNSL wantaim 27 poin. Namba tu long olem Sepik FC wantaim 19 poin bihain long ol meri Sepik i bagarapim sindaun bilong Bara FC long las wiken wantaim 4-0 skoa.

James G. Kila i raitim