RAGBI Lig em i namba wan spot we planti yangpela manmeri na papamama i save amamas long lukim na pilai tru.

Namel long olgeta posisen insait long ragbi lig i gat 3-pela pawaful namba we i save kontrolim na lukautim gem insait long fil. Ol tupela hap 6, 7 na dami em namba 9. Bikpela wok long abrusim ol 10 mita, 20 mita em fowat i save wokim sapos ol ki namba i toktok wantaim insait long fil.

Kepten bilong Megusa Sisters Eva Paul husat i gat planti ekspriens long ragbi lig i tok tim i save win taim ol i gat strongpela difens na tu ol gat ol gutpela hap  na dami.

“Mi bin stat pilai ragbi liklik taim yet na nau mi lukim olsem ragbi em i kamap namba wan samting long laip bilong mi,” Eva i tok.

Em i tok dispela em bodi kontek gem na sampela taim bikpela bagarap i ken kamap namel long fil olsem na bihain long kisim fil, olgeta pilaia i save tokaut long olgeta rong bilong ol pastaim.

“Mipela pilaia gut aninit long lidasip bilong John Marme husat i ona bilong tim na man i go pas long lukautim Morata Off-Sisen kompetisen long Kone Tigers,” em i tok.

“Mipela laik pilai na lainim ol yangpela nupela pilaia husat i laik pilai ragbi lig na kamap gutpela ragbi pilaia,” em i tok.

“Mi amamas olsem mipela winim gem na luk fowat long neks raun bilong gem na tu mekim sampela senis long gem stail bilong mipela insait long fil,” em i tok.

John Marme i wanbel long tim bilong em i winim gem long las wik Sarere na isalensim ol long sampela ausa insait long fil.

Jacklyn Kimala i raitim