MORATA Off-sisen Ragbi Lig kompetisen i bin stap longpela taim olsem na em  bai go het long bihain taim aninit long sponsa bilong NCD.

Dispela lig kompetisen i save bungim planti tim long resis wantaim tasol long dispela yia i gat 14 moa tim i bin joinim wantaim ol 23 klap bilong Morota yet.

Namel long dispela olgeta tim i gat 14 meri tim tasol i bin rejista long dispela yia na ol narapela klap i no gat meri tim bihain long sisen i bin stat.

Operesen Menesa bilong Morata Off-sisen John Marme i tok dispela sisen i gat 7-pela tim bilong ol meri long Pul A na 7-pela long Pul B na ol resis long 11-pela wik bilong kompetisen na go insait long nok aut.

Em i tok ol meri tim i bin statim sisen long namba foa wik bilong kompetisen olsem na ol meri bai pilai tupela wik moa bilong tupela divisen wantaim long pinisim sisen raun na go insait long nok-aut.

“Nau mipela i stap long wik 8 bilong man divisen na wik 4 bilong wimen divisen na mipela i gat 3-pela wik bilong tupela divisen wantaim long pinisim dispela raun,” Mista Marme i tok.

“Bihain long tripela wik bilong kompetisen i pinis bai mipela i go insait long fainel, na long wimen divisen fainels nok-aut na bai mipela i go long top 8, 4-pela tim long wan wan pul. Na long ol man bai i gat top 6 long wan wan pul,” em i tok.

Planti bilong ol meri i no save long pilai ragbi bikos ol stap nating long haus. Ol skul meri tu i amamas long lainim planti samting long ol ekspriens pilaia olsem na mi bilip olsem ol bai go het long pilai rabgi lig na lainim planti samting.

“Mipela i gat sampela sinia meri husat i laik stap lains meri na kamap referi long bihain taim long dispela kain sisen. Morata Off-sisen bai go het bikos em olpela kompetisen na mipela i no tok orait long nupela tim long kam insait bikos mipela stap namel pinis long sisen raun.

“Mi laik askim olgeta meri i mas kam joinim tim long pilai na lainim ragbi lig bikos bihain bai i gat ol Suburb kompetisen. Anda 20 meri bai gat spes long Kone Tigers olsem na pilai strong long stap insait long klap,” Marme i tok.

Jacklyn Kimala i raitim