SP Brewery neming rait sponsa bilong PNG Hunters tim husat i save oltaim sanap beksait na sapot i bin mekim fewel  nait bilong ol Hunters wantaim olgeta bikpela sponsa na PNGRFL Bod long las wik Fonde.

Dispela fewel nait i bin bungim Minista bilong Spots na Haia Edukesen Risets, Sains na Teknoloji Wesley Raminai, Meja Dairekta bilong KPHL Wapu Sonk, CEO bilong PNGRFL Stanley Hondina, Siaman bilong PNGRFL Sandis Tsaka, Menesing Dairekta bilong SP Brewery Ed Weggemans na ol arapela spesel pipel wantaim olgeta Hunters pilaia na midia.

Long wankain taim SP Brewery i bin sainim wanpela  pepa wantaim PNGRFL olsem tok promis bilong sapotim SP PNG Hunters long olgeta sisen bilong ol bai kamap na tu long stap bilong ol daunbilo long Australia.

Minista bilong Spot na Haia Edukesen Risets, Sains na Teknoloji Wesley Raminai i bin mekim tok long fewel nait olsem olgeta Hunters pilaia i mas tingim olsem ol bai i no stap ol yet tasol ol bai makim komyuniti, distrik, Provins, wan wan ples na kantri olgeta.

Em i tok dispela em gutpela sans bilong Hunters pilaia long maketim futbal talen bilong ol na mekim ol PNG i amamas  olsem mipela i ken stap namba wan.

“Mipela bai amamas olsem ragbi lig em nesenel spot bilong mipela na taim Hunters makim mipela long Australia em bai bikpela stori long PNG Hunters,” Minista Raminai i tok.

Menesing Dairekta bilong SP Brewery Ed Weggemans i bin makim maus bilong olgeta wokmanmeri bilong SP Laga kampani na tok gud lak long PNG Hunters pilaia long go daun beis long Australia long 2021 Intrust Super Cup sisen.

“KPHL i bin amamas long sapotim PNG Hunters na sainim pepa long Desemba 2020 bikos ol i laik lukim Hunters i mas go daun na soim trupela pes bilong PNG divelopmen bilong pilai ragbi lig na tu kamap embeseda bilong PNG long Australia,” Meja Dairekta bilong KPHL Wapu Sonk i bin mekim dispela tok long fewel nait.

SP PNG Hunters i mas pilai klin gem na rispektim wanpela narapela long taim bilong sisen trening na gem wantaim long bungim olgeta gol we ol i bin setim pinis.

Jacklyn Kimala i raitim