NU Ailan Provins bai go pas long stiaim PNGRFL Gavanens Fremwok. Long statim dispela Nu Ailan Model, em Nu Ailan Ragbi Futbal Lig bod bilong Papua Niugini Ragbi Lig i bin tokaut klia long las wik Fraide 22, Janueri wantaim stap bilong Nu Ailan Gavana Sir Julius Chan,

Siaman bilong PNGRFL Sandis Tsaka, CEO bilong PNGRFL Stanley Hondina, Edministreta bilong Provins Lamiller Pawut, PEC Siaman bilong Yut, Wimen na Spot Sikal Kelep na ol narapela opisa.

Dairekta olsem Benjamin Wakip, Byron Chan, Sikal Kelep, Rubie Kerepa, John Keleu na Les Kapin tu i bin stap long lukim dispela bikpela de.

 “Nu Ailan Bod bai Gavanim Ragbi Lig long provins bihainim PNGRFL Gavanens straksa. Ol bai stap independen na self sasteining, kisim ol sponsasip bilong ol bisnis haus wantaim provinsel gavman long menesim dispela kod bilong Ragbi Lig long kamapim Nesenel level na Intenesenel mak wantaim sapot bilong mama bodi PNGRFL,” Tsaka i tok.

Ol Nu Ailan Gavman i bin sainim faivpela yia Memorendum bilong Agrimen wantaim PNGRFL long las yia long fandim dispela Nu Ailan Ragbi Lig bod long mani mak K100,000 long wan wan yia. Em bai stat dispela yia. Gavana bilong Nu Ailan Sir Julius i bin tok klia olsem ol Provinsel Gavman bai no inap stap insait wantaim ol bod long mekim disisen long kamap, independen na fri long olgeta politikol pasin.

 “Mipela i no gat hevi long givim mani long dispela kod, tasol mipela laik mekim bai olgeta mani i mas go long stretim rot na yusim long bungim na divelopim ol pipel bilong mipela,” Sir Julius i tok.

Dispela PNGRFL plen long bihainim wankain model long narapela provins bai kamap long mun antap. Tsaka i bin tokaut olsem ol i bin makim Nu Ailan pas long arapela provins long stia long Gavanens Fremwok straksa bikos dispela em soim ol bod i ken fri long politikol pasin o narapela ol pati bodi.

Long nau Nu Ailan Provinsel Gavman na ol PNGRFL bod i luk fowat long opim dispela nupela Nu Ailan Multi-Complex spoting stedium long Septemba dispela yia.

Ol spesel pipel tu i gat sans bilong go lukim dispela stedium. Siaman bilong PNGRFL Sandis Tsaka i bin go lukim seremoni bilong brukim graun long las yia long taim bilong Nu Ailan De selebresen long 27 Julai.