SP HUNTERS fainel skwat i bin kamap pinis tasol dispela i no pinisim olgeta wok bilong sisen yet,  we ol i gat moa wok i stap long wokim bikos sampela nupela pilaia tu i joinim klap wantaim ol ekspriens pilaia.

Dispela em laspela tupela wik bilong ol Hunters long stap na bai ol lusim Pot Mosbi long 31 Jenuari 2021, na go beis long Australia inap 8-pela mun.

Het kosa bilong PNG Hunters Mathew Church i tok planti bilong ol pilaia i stat senisim pasin bilong ol long lokal na Digicel Kap kompetisen i kam long intenesenel mak bihain long las yia pri-sisen.

“Mipela i lukluk moa long strongim difens na atek wantaim ol sampela moa trening skil long dispela tupela wik i stap bihain long go daun na bungim asisiten kosa Paul Aiton,” Church i tok.

“Pilaia olsem Ase Boas, Stanton Albert, Joe Joshua na ol narapela pilaia husat i gat bagarap em mipela apim intensiti tritmen bilong ol long orait gen bikos ol i no bikpela bagarap,” em i tok.

“Mipela traim long strongim banis na go daun tasol mipela i gat planti wok i stap long mekim na traim lukluk long en pastaim bihain long sisen kik ov,” Church i tok.

“Tupela yangpela halves bilong mipela Judah Rimbu na Solomon Pokare i bin mekim gut long las pri-sisen tasol mipela bai lukluk long ol ekpriens pilaia tu long sanap beksait wantaim na sapotim tupela.

Em i tok Jokedi Bire i kamap wankain olsem Justin Olam long dispela olgeta sisen trening we em i bihainim mak bilong Olam.

Asisten kosa bilong Hunters Paul Aiton i bin amamas na wetim tasol go bilong ol Hunters pilaia na kosa Mathew Church long Australia.

Jacklyn Kimala i raitim