MASKI ol  Australia i sapotim tim PNG wantaim $250,000 long fand long helpim ol pilaia long tren i gat pret dispela i no inap long helpim ol Pilaia I tren gut na kwalifai.

Papua Niugini Olympic Komiti i raitim pas i go long Australia Gavman long kisim tok orait bilong ol long ol PNG pilaia long tren long hap long sikspela mun bipo long Tokyo gem stat.

‘Em tru ol i no ol Australian sitisen na tu ol i no gat haus bilong go stap na em i bai mekim hat long ol pilaia long go stap na tren’, Chef de Misen Tamzin Wardley i tok.

Dika Toua i tok Australia i helpim Papua Niugini long planti rot na tim PNG bai hamamas stret sapos ol i tok orait long go long ap na tren.

Dipatmen bilong Foren Afeas i mekim stetmen na tok Australia i gutpela spot patna bilong Papua Niugini na tu em bai orait long ol PNG Olympic Komiti long Australia bai lukautim ol pilaia bilong PNG gut long sik COVID-19.

Suta bilong gun gem Danny Wanma i laik tru long ol i kisim em long go pilai long Olympic gem long Tokyo.

Em i save trening long Brisbane tasol ol i bin salim em i kambek long PNG bilong wanem sik COVID-19 i bagarapim wol.

Wanma i tok COVID-19 i mekim na bagarapim olgeta samting tasol em i mekim trening yet bilong em yet long wanem umi ol man i nogat kontrol lo dispela sik.

Nogat gutpela ol ikwipmen long tren long sut tasol Wanma i traim strong bilong em na tren long stap helti na tu long pilai tenis long redim em long go pilai long Tokyo.

Em i gat tupela tingting sapos em bai fit long go sut o nogat tasol em i tok long go long Australia na tren em bai gutpela sans bilong em.

UPNG Jenelis Sumatin Martina Takaneng i raitim