Nesenel Women’s Soka Lig bilong dipela yia i bin kik op long namba 5 de long mun Disemba 2020 na i bin givim gutpela risal bilong stendet bilong ol gem bilong meri long namba wan raun.

Namba wan pilai tim bilong Pot Mosbi Football Club (POM FC) i winim NCD FC. Tupela wik bihain POM FC i lusim tupela gem egensim Genesis FC na Hekari FC. Dispela tupela tim i gat ol gutpela soka pilaia long winim dispelaLig.

Long winim gem ol tim mas pilai wantaim gutpela teknikel na menesmen sapot, bai i ken winim tupela gem long raun wan egensim POM Academy FC na Amoa na FC taim ol i statim gen pilai long 16 Janueri 2021.

Het kosa bilong POM FC Frederica Siwin Sakette i tok ol pilaia mas lukluk i go het na mipela i mas wok strong nau long winim olgeta pilai long namba tu raun.

Ol meri i tingting long joinim dispela tim, ol mas soim futbal skil long taim bilong lokal kompetisen we i ken pulim ai bilong ol teknikel na menesmen bilong Port Moresby Football FC, Het kosa Fredrica  i tok.

I gat 4-pela hap kona bilong futbal na ol pilaia i mas lainim gut olgeta dispela kona long kamap gutpela pilaia.

Dispela 4-pela em teknikel, tektikel, fisikel na mentel. Sapos yu meri i gat dispela, yu em ‘komplit pilaia’.

Frederica i laik tok amamas long ol pilaia na ol pilaia long dispela sotpela malolo, i mas stap wantaim famili na ol pren. Welkamim gut Nupela Yia 2021. Lukautim yupela yet gut na lukim yupela olgeta long taim trening stat long namba 6 de long mun Janueri 2021.

UPNG Jenelis Sumatin Martina Takaneng i raitim