Korry Security Service (KSS) Flames Basketbol Tonamen i stat long asde long Hohola, Pot Mosbi, na bai pinis long Sarere bihain long nupela yia.

Dairekta bilong dispela tonamen Jerry Pango na asisten bilong en kosa bilong nesenel basketbol, Moi Muri na tupela semi profesenel basketbol pilaia Purari na Obert Muri i go pas long lukautim dispela 3-pela de basketbol tonamen.

Ol i amamas tru long bikpela sponsa bilong dispela tonamen John na Vinnie Kapinato, tupela papamama bilong KSS, long gutpela pasin na sapot tupela i givim long kamapim dispela tonamen.

Dairekta Jerry Pango i tok tripela bikpela as tingting bilong kamapim tonamen namel long krismas na niu yia em long bringim ol yut i go longwe long dring bia, smok nogut na ol arapela bikhet pasin ol i bai gat tingting na laik long mekim long krismas.

Mista Pango i tok narapela bikpela tingting tu i olsem, ol i laik bungim ol yut i kam klostu na mekim ol redi long ol primiasip we bai kamap long 2021. Na namba tri em long mekim ol yut i no ken lustingting long pilai basket bol. Em i tok COVID-19 i mekim na longpela taim ol yut i no pilai basketbol.

“Mipela i no laikim ol yut bilong mipela long dring bia na mekim ol arapela samting we bai bagarim laip bilong ol. Mipela i laik bungim ol yut bilong mipela, trenim ol na putim ol insait long dispela tonamen. Dispela i ken redim ol yut long mens basketbol primia lig long neks yia,” Jerry Pango, Dairekta bilong KSS Security Service Flames Basketbol Tonamen i tok.

I gat 3-pela divisen, anda 13, anda 17 na ol sinia. Ol yut i kam long olgeta hap bilong tripela ilektoret long NCD na krismas bilong ol i 15 na i go antap.

Rebecca Negere i raitim