Gavana Kap ragbi lig i go het long Kaugere spot stedium long asde Trinde 30 Desemba. Astingting bilong dipela gem em long mekim ol yut long bisi long amamas bilong dispela holide sisen na stap long we long trabel.

Ol i bin statim dispela gem long Koni Tigers fil wantaim 48 tim na nau ol i laik pinisim gem long Kaugere fil. Long Sande 4 Desemba em bai semi-fainel na long Tunde 5 Desemba em bai gren fainel bilong Gavana Kap long Kaugere fil.

Gavana Kap tonamen Dairekta Simon Nuabo i tok Gavana i putim dispela gem long ol yangpela bai pilai na soim ol skil bilong ol. Na tu ol i askim sampela ol bikpela PNG tim menesa long kam lukim gem na skil bilong ol yangpela i pilai long ol bai ken gat sans long go pilai wantaim ol tim bilong ol.

Mista Nuabo i tok tu olsem dispela gem i kamap long kisim ol pipel kam bung na selebretim dispela holide sisen bilong Papua Niugini na tu long promotim SME long ol mama long kam salim ol kaikai na dring na mekim mani.

Long lukluk bilong gem em i soim olsem Komyuniti i kam wok bung wantaim ol menesa bilong gem long dispel  holide long mekim dispela gem i ran gut wantaim nogat hevi.

UPNG Jenelis Sumatin Martina Takaneng i raitim