SP PNG Hunters i pinisim las pri-sisen trening bilong ol long Tunde 22 Desemba 2020, long Pot Mosbi.

Olgeta tim i go bek long wan wan  haus bilong ol na bai wetim tasol fainel 30 man fainel skwat long go daun long Australia long pilai 2021 Intrust Super Cup sisen.

Het Kosa bilong PNG Hunters Mathew Church i tok dispela tripela wik pri-sisen trening bilong tim i bin go orait, maski Ase Boas i gat bagarap long skru bilong lek tasol em pusim em yet long laspela wik bilong trening.

“Long dispela tripela wik pri-sisen trening i bin mekim bikpela senis long ol nupela yangpela pilaia husat i joinim klap  long dispela yia maski COVID-19 i bin bagarapim yia tasol ol i gat bikpela tingting long 2021 Intrust Super Cup,” Church i tok.

“Mi bin lukim long trening olsem olgeta yangpela pilaia i redi long pilai long 2021 sisen na tu wantaim helpim bilong ol olpela pilaia i bin strongim ol nupela pilaia long pusim ol moa long fitnes sait,” em i tok.

Em i tok olgeta pilaia i mas lukautim kaikai na dring bilong ol tai mol i go kisim Krismas brek na tu lukautim fitnes na stap helti.

Church i tok bikpela samting em ol pilaia i mas save long sampela skil olsem, ran strong na pilai strong insait long fil.

“Mipela trening wantaim olgeta samting long tripela wik pri-sisen na mi lukim olsem bikpela senis kamap long ol olpela na nupela pilaia wantaim, nau ol bai go bek long haus na kam bek long neks yia taim fainel skwat kam aut,” em i tok.

Jacklyn Kimala i raitim