Coral Sea Hotels i bin tok orait long go het na sapotim Papua Niugini Olimpik Komiti (PNGOC) long givim rum na ples bilong stap long redim ol etlits long bikpela spot bung.

Jenerel Menesa bilong Coral Seas Hotels Peter Laigaard Jensen i tok dispela hotel grup em longpela taim sapota bilong ol spot bilong PNG, wantaim sapot bilong ol PNGOC. “Mipela i bin go long Pasifik Gem long 2015 olsem meja sponsa, na mipela i bin welkamim tu ol spot opisal na pilaia long taim bilong bikpela bung,” Mista Jensen i tok.

“Spot em bikpela hap bilong komyuniti i stap long PNG, na ol lain husat i makim mipela bringim moa hona kam long kantri,” em i tok.

“Sapos mipela i ken bungim han wantaim na redim ol provisen bilong hai kwaliti hospitaliti, em bai mipela inap long stap long gutpela mak bilong mekim PNG i amamas.”

Jenerel Seketeri bilong PNGOC Auvita Rapilla i bin bekim tok bilong Mista Jensen na tok tenkyu long Coral Seas Hotels long sapotim spot longpela taim long PNG.

“Mipela i amamas long dispela sapot bilong Coral Seas Hotels bikos em groim patnasip longpela taim.”