NESENEL Kepital Distrik (NCD) i save holim wan wik Gavana’s Kap tonamen long olgeta yia. Dispela tonamen i bin stat pinis long Kone Tigers fil na Kaugere, bihain long papa bilong Kap Gavana Powes Parkop i bin opim wantaim olgeta kepten bilong ol tim husat bai resis long wantaim.

Dispela tonamen i bin divelopim talen bilong planti yangpela man ragbi lig na tu dispela tonamen i bin kisim ol go antap long intasiti mak na Hunters.

Gavana’s Kap long las yia em mani mak bilong K60, 000,  tasol long dispela yia mani i go antap long K100, 000 long ranim dispela tonamen.

Gavana Powes Parkop i tokaut klia long olgeta kepten olsem, “No gat wanpela pilaia i gat rait long paitim referi o tas jas insait long fil na ausait tu bikos em bai bagarapim olgeta tim na rausim poin bilong ol.

“Mipela i no putim dispela tonamen long winim prais mani na kap tasol. Em i bilong apim skil na talen bilong yupela long ragbi long siti na kantri wantaim,” Parkop i tok.

Parkop i tok, “Mipela bai lukim divelopmen long spot olsem ragbi na ol arapela spot tu bikos em wanpela rot long senisim het bilong ol yut na bringim ol i kam klostu long save wanem samting em rait na rong.”

Em i tok dispela tonamen i bin stat long Mande 21 Disemba, 2020 na semi-fainel pilai-ov bai kamap long Sarere 26 Desemba na Gren fainel  long Sande 2 Desemba, 2020.

“Maski mipela bungim planti hevi namel long yia tasol Gavana’s Kap tonamen bai go het na bungim ol yangpela long selebretim Krismas wantaim dispela gem na amamas,” em i tok.

“Long neks yia mi bai lukim wankain namba bilong ol meri tim tu bai resis long dispela tonamen olsem ol man.”

“Mi laik tok gud lak long dispela 2020 tonamen na hepi Krismas long olgeta tim husat bai resis wantaim olgeta wok manmeri bilong dispela tonamen long holim naispela resis bilong yia,” em i tok.

“Mi laik salensim tu olgeta 48 tim long pilai strong tasol pilai klin wantaim rispekt long narapela na yusim ragbi lig olsem pawaful pletfom long divelopim yangpela man,” Parkop i tok.

Em i tok strongpela tim bai winim 2020 Gavana’s Kap gren fainel na kisim kap wantaim prais mani.

Jacklyn Kimala i raitim