WANPELA yangpela pilaia bilong Mendi Sauten Hailans Provins Solo Wane husat i gat
bikpela driman long pilai ragbi lig i bin brukim solwara wantaim strongpela gren fainel win
na painim laki spes insait long 2021 SP Hunters skwat.

“Mi bin guria na amamas long joinim Kroton Hela Wigmen long dispela yia na winim 2020
Digicel Kap gren fainel,” Solo Wane i bin tokim Wantok Niuspepa.
“Dispela em bikpela samting long laip bilong mi olsem nupela pilaia na tu Wigmen i bin
kisim mi stret long lokal lig bihain long ol i bin lukim gem bilong mi,” Wane i tok.
“Mi nupela pilaia na taim mipela i bin go insait long gren fainel i bin mekim mi amamas tru,
bikos dispela em namba wan taim bilong mi long pilai insait long Digicel Kap na go insait
long gren fainel,” em i tok.
“Mi bin putim wanpela trai long gren fainel wantaim Lae Snax Tigers na helpim tim na
olgeta sapota long winim gren fainel,” em i tok.
Dispela i bin strongpim tingting bilong Solo long pilai ragbi na driman yet long haus o olgeta
hap taim em raun.
Solo i gat bikpela driman long pilai wantaim ol Hunters na go het long ragbi laip bilong em
taim em stap yangpela yet.
“Bel bilong mi i bin kalap go antap na kam daun wantaim amamas taim mi bin harim gutpela
nius olsem nem bilong mi stap long 2021 Hunters skwat bikos mi nupela pilaia bilong intasiti
na mi no ting ol bai kisim mi,” em i tok.
“Mi pilai namba wan taim wantaim ol Wigmen, na mi bin kisim 3-pela awot em, winga
bilong yia awot, top poin skora awot na People’s Choice awot,” Solo Wane i tok.
“Mi bai traim wok strong long stap insait long fainel skwat bilong 2021 Intrust Super Cup na
go daun long Australia,” em i tok.
“Maski nem bilong mi stap long Hunters skwat tasol planti wok wetim mi stap long kisim
spes long fainel man skwat, olsem na bikpela tingitng bilong mi long pasim olgeta tes na
pulim sokis bilong mi wankain olsem ol eksperiens pilaia,” em i tok.

Jacklyn Kimala i raitim