Gren fainel de long Mosbi Saut i bin bringim planti ol pipel i go long lukim ol pilaia bilong Nesenel Kapital Distrik long traim bun long JT supa 9s tonamen long Mosbi Saut Stedium, Kaugere.

Sikispela de tonamen i bin pinis wantaim stail na strongpela gren fainel ragbi lig gem bilong ol divisen bilong U20, wimen na siniamen pilai ov bilong boul, pleit na kap wantaim kes mani prais.

Ol manmeri na pikinini i pulapim gren sten na planti i kam sanap na lukim gem long dispela nupela stedium.

Bodi i bauns, rol na das i kirap tasol i gat rot tasol long win em long ol skil, talent na bal sekyuriti i go long trai lain.

Long siniamen kap fainel gem namel long Hulukumaiya Sub CT Raiders na Central Ace 54 Bears i pilai strong wantaim sampela ol biknem pilaia long tupela tim wantaim i soim pawa na stail tru bilong gem.

Klostu gem i laik pinis na 30 sekens tasol i stap long klok na kepten bilong Bears i salensim disisen bilong refri na em i winim bal long 15 mita long teritori bilong ol yet na ran i go putim wining trai, taim Raiders lid long hap taim skoa 6-4.

Kik i go insait na Bears i kamap king bilong JT supa 9s na kisim kap na K20, 000.00 kes mani na Raiders i kisim rana ap tropi na K10 000. 00 kes mani.

Ol gren fainel bilong boul, pleit na kap bilong olgeta divisin i kisim tropi wantaim kes mani tu.

Bihain long presentesen MP Justin Tkatchenko i tok em i amamas tru long ol pilaia na ol pipel na em i tokim ol pipel olsem bai i gat 2021 JT supa 9s tonamen bai kamap gen.

Operesenel menesa bilong JT supa 9s tonamen Bagelo Solien tu i tokim  long ol pipel i mas lukautim dispela stediem gut.

Joseph Dawai i raitim