DISPELA sans bilong ol SP PNG Hunters long go beis long South East Queensland na pilai long 2021 Intrust Super Cup em gutpela divelopmen bilong ol lokal pilaia bai i ken lainim ol nupela samting long mak bilong QRL na pilai olsem Stet ov Orijon gem,” Het kosa bilong Hunters Mathew Church i bin tok.

Kosa bilong SP PNG Hunters Mathew Church i tok dispela em gutpela bilong ol Hunters pilaia long go beis long Australia bikos dispela i ken opim rot bilong ol PNG long NRL klap tu.

Ekting CEO bilong PNGRFL Stanley Hondina i tok, “Hunters tim i mas pilai long 2021 sisen bikos mipela i bin hatwok long statim Hunters tim long Intrust Super Cup na sapos mipela lusim dispela sisen em bai mipela hatwok na lusim moa risos gen long go insait long Intrust Super Cup.

“Mipela i gat join wok komiti husat i bin wok long stretim ol ples na hap bilong ol Hunters pilaia bai go na stap long South East Queensland, long gutpela bilong tim bilong mipela,” Hondina i tok.

“Mipela tok tenyu long opis bilong Vais Minista bilong Spot Wesley Raminai na Gavman long sapotim dispela long wok wantaim gavman bilong  Queensland,  tupela Stet gavman wantaim QRL na PNGRFL long mekim tim bilong mipela bai pilai yet long 2021 Intrust sisen,” Hondina i tok.

 “Mipela bai traim long toktok wantaim ol NRL klap long Hunters tasol dispela em i no isipela rot olsem na bai mipela traim pasim tok wantaim ol pilaia bilong Kumuls husat i beis long Australia na pilai wantaim ol NRL klap bai ol traim mekim rot mipela olsem affiliate klap bilong ol,” Church i tok.

Jacklyn Kimala i raitim