JT Sper 9s i stat long Tunde 17, Novemba long Nesenel Kepital Distrik na bai pinis long Sande 22 Novemba.

Dispela em wan wik tonamen bilong Sinia man divisen, Anda 20 na Wimen divisen wantaim bai resis long dispela tonamen we i kamap nau long Kaugere Mosbi Saut Stedium.

Ol i statim dispela tonamen bihain long ol i bin kisim tok orait long PNGRFL na Spot Faundesen long ranim dispela tonamen wantaim 48 tim olgeta bilong sinia man, Anda 20 na Wimen divisen.

Operesenel menesa bilong JT Super 9s Bagelo Solien i tok dispela tonamen bai gat 3-pela de raun robin em stat long Tunde, Trinde, Fonde na long Fraide ol bai go insait long top 16 tim we Kap kwalifais, ol lusa em bai kam daun long bowls na plate.

Mista Solien i tok bihain ol bai go insait long top 4 tim na bai pasim wantaim tupela tim long gren fainel long lukim husat bai winim 2020 JT Super 9s Kap.

“Sponsa bilong dispela tonamen i sapotim ol 100 pesen wantaim K83,000 kes mani long ranim dispela tonamen na prais bilong Kap fainel bai kisim K20,000 kes mani, rana-ap bai kisim K10,000 kes mani, Junia bai kisim K5,000 na ol meri K5,000,” Solien i tok.

“Long wankain taim ol tropi na awot em inap long K9,000. Ol referi, mets opisal, graun wokmanmeri, sekyuriti olgeta dispela i kostim mani long ranim dispela kain tonamen tasol mipela i laik tok tenkyu long memba Justin Tkatchenko husat i gat bikepla tingting long bringim spot i go narapela mak,” Solien i tok.

Jacklyn Kimala i raitim