TRIPELA raun bilong PRL kompetisen i bin givim sans long wanpela yangpela meri pilaia bilong Hohola Flies, Lorina Karo husat i bin pilai gut na kisim poin wantaim mani.

Insait long dispela 3-pela raun gem, Lorina i bin pilai autstending gem na pulim ai bilong olgeta sapota na opisal bilong PRL kompetisen wantaim. Lorina em nupela pilaia bilong Hohola Flies. Em i bikpela long Hohola tasol em i no save pilai wantaim ol bipo.

“Mi bilong Suruki ples bilong naispela strawberi i save kamap long Enga provins. Mama karim mi na mi bikpela long Mosbi tasol mi i no save pilai long wanpela PRL tim. Dispela yia em namba wan taim bilong mi long pilai long PRL kompetisen olsem na mi amamas,” Lorina Karo i bin tokim Wantok Niuspepa.

“ Mi bin pilai wantaim ol Suruki Samu tim bilong Enga tasol taim mi bin mekim gret 5 posisen namba bilong em dami. Gem bilong mi olgeta sapota i save laikim stret na mekim planti toktok tasol mi bin lusim na stap nating inap dispela yia mi joinim Hohola Flies,” em i tok.

Lorina i bin kirap nogut taim ol Opisal i bin singautim jesi namba bilong em long kisim poin na mani bilong em long namba wan gem, long namba tu gem, em i bin kisim wanpela poin tasol na long namba tri gem em i bin kisim poin wantaim K30 win mani.

Em i tok dispela em bikpela samting long laip bilong em bikos em i no save olsem ol bai mekim dispela kain long em, na tu em i nupela pilaia bilong tim.

“Mi lainim ol olpela pilaia bilong PRL pastain na ol PNG Okids pilaia husat i pilai long narapela tim olsem nupela pilaia i ken pilai gut na kisim pilaia bilong mets maski ol ekspriens pilaia tu i bin salensim em,” Lorina i tok.

Lorina Karo nau i luk go het long neks yia PNG Okids skwat seleksen bikos em i pilai gut na olgeta opisal i amamas long gem bilong em insait long fil, maski ol ekspriens pilaia i bin pilai wantaim em tasol em i bin kisim wimen ov mets awot.

Jacklyn Kimala i raitim