POT Mosbi Ragi Lig (PRL) i bin bung long las tupela wik wantaim disisen bilong PNG Ragbi Futbal Lig (PNGRFL) olsem olgeta pilaia bilong ol PRL klap i mas rejista wantaim K50 na kisim fil,”

Operesen Menesa na Lig Edministreta bilong PRL Macke Mahino i bin tokim Wantok Niuspepa.

Dispela em bikpela salens long olgeta pilaia husat i pilaia insait long ol tim bilong PRL. Ol i mas rejista bikos sapos wanpela pilaia i no rejista na pilai em bai rausim poin bilong tim.

“Raun 1 i bin pinis wantaim 7-pela wik gem bilong tim we mipela i no bin fosim ol pilaia long rejista tasol dispela raun 2 em kain olsem semi-fainel siris olsem na olgeta pilaia i mas rejista bikos i gat 14-pela klap we mipela i bin brukim namel na 7-pela klap long pul 1 na narapela 7-pela long pul 2,” Mahaino i tok.

Em i tok dispela raun 2 bilong sisen em ol lukluk long pilaia rejistresen wantaim ful rekot bilong wan wan pilaia.

“Ol Digicel Kap pilaia bai no inap pilai wantaim wanpela PRL tim bikos ol i bin statim sisen pas long PRL bikos long trening na fitnes seifti bilong ol pilaia,” Mahino i tok.

“Long gem bilong ol meri em 4-pela tim i save givim fofit tasol em Magani, Koni Storms, Hanuabada Hoks na Defence we ol i no gat meri divisen, olsem na nau mipela i gat 10-pela tim bilong meri husat i resis long 4-pela wik,” em i tok.

“Ol Anda 20 na A-gret bilong ol man i gat 13-pela tim tasol i stap long resis na go insait long top 8 fainel siris,” em i tok.

“Mipela bai askim ol tim long kam pilaia namel long ol wik bikos no gat taim. Mipela i tingting long holim Gren Fainel long 18 o 19 Desemba o no gat em bai long neks yia Janueri.”

Jacklyn Kimala i raitim