POT Mosbi Soka Asosiesen i kamapim 9s tonomen resis long kik statim kompetisen bilong ol long dispela yia.

PMSA soka resis i pas long taim sik Corona i bin kamap na ol pasim olgeta pilai insait long PNG long larim dispela sik i pinis.

PMSA i kisim tok orait long ranim kompetisen bilong ol gen na long las wken i go pinis ol singautim ol tim husat i amamas long kamapim tim long 9s i ken kam pilai.

I nogat planti nupela tim tumas i joinim olsem na planti olpela tim long Pot Mosbi Soka Asosiesen i kamapim tupela tim long pilai resis long dispela 9s kompetisen.

Long las wiken ol i stat long kisim poin na long las wiken antap ol mekim ol traim pilai tasol long bringim tingting bilong ol pilaia kam bek long soka.

I gat tupela tim biong ol meri is tap insait long dispela kompetisen. Dispela tupela tim bai kamapim wanpela NSL tim bai resis long Nesenel Soka Lig we bai kamap long klostu taim.

Dispela 9s kompetisen bai ran i go inap Desemba na ol bai kamapim Pot Mosbi Soka resis bihain tasol long 9s soka tonomen.

Bisini Soka graun bai stat kam laip gen bihain long longpela taim nogat soka pilai i bin kamap.

Nicky Bernard i raitim