BIKPELA salens long kamap referi insait long fil, taim husat man o meri i laik kamap referi em ol i save kisim sampela trening pastaim bihain long kamap referi.

Em i no isi wok long winim wisil insait long fil,” wanpela lokal referi bilong PRL Glen Pakii i bin tokim Wantok Niuspepa.

“Namba wan skul bilong kamap referi em ranim touchy sain, mipela i save givim penalti long hai takol na skram i save kamap taim ol pilaia lusim bal o fowat pas,” Pakii i tok.

“Taim mipela i winim wisil long skram em mipela i save lukim pilaia husat i opsait bai no ken mekim takol, na nok on bal tu wankain,” em i tok.

“Trai o i no trai referi i gat pawa long winim wisil na awotim trai long tim. Sapos wanpela pilaia insait long fil paitim referi em bai bagarapim nem na lusim poin bilong dispela tim,” em i tok.

“Mipela i save bihainim wanem instraksen bilong ragbi lig bikos sampela taim mipela save mekim asua tu insait long fil, tasol mipela i save sanap strong long ranim gem inap 40 minit pinis,” Pakii i tok.

Em i tok dispela wok bilong referi i bin givim strong long ranim gem insait long fil na tu redi long takolim salens long wok bilong em olsem referi.

“Mi amamas long kamap referi bikos dispela wok i bin senisim laip na pasin bilong mi long rispektim lo bilong PRL o arapela lig,” em i tok.

“Maski referi wok i no isi tasol em kaikai bilong mi, mi mas balensim gutpela disisen namel long tupela sait tim wantaim long wanbel na pilai,” em i tok.

Jacklyn Kimala i raitim