Ol strongpela golp pilaia bilong Pot Mosbi na ol narapela senta i bin gat sans long dispela Tim PNG, Praim Minista Kopret Golp Salens i bin kamap long las wik Fraide 30 Oktoba 2020 long Pot Mosbi.

Dispela i PMs Golp Salens i save kamap long olgeta yia wantaim olgeta ogenaisa, ol Papua Niugini Olimpik Komiti i luk fowat long lukim ol belhat tasol ol i kamap gutpela pren long Pot Mosbi grins gen.

Seketeri Jenerel bilong ol PNG Olimpik Komiti Avuita Rapilla i tok ol kopret na bisnis haus i save sapotim dispela PMs Kopret Golp Salens olgeta taim wantaim patnasip bilong mipela olsem na mipela i amamas long holim dispela bung gen long dispela yia tasol aninit long strongpela COVID-19 protokol na lo.

 “Wantaim dispela Olimpik Gems i bin surukim go neks yia (2021) em bikpela samting olsem mipela i gat sapot bilong olgeta patna, kopret pren na ol pablik na mipela i luk fowat long Golp Salens long Pot Mosbi,” Rapilla i tok.

Ol wina bilong kompetisen i bin winim PMs Kopret Golp Salens 2020 wina tropi na taitel olsem sempien. Ol i bin kisim wantaim Air Niugini balus tiket bilong Pot Mosbi go Rabaul na kam bek. Namba tu ples wina i bin kisim Air Niugini tiket bilong Pot Mosbi go Kavieng na kam bek. Na long wankain taim ol namba tri ples tim i kisim Air Niugini tiket bilong Pot Mosbi i go Alotau na kam bek.

COVID-19 i bin pasim olgeta rot bilong kantri olsem Australia. Ol balus prais long dispela bung em bin domestik tasol o bilong PNG tasol. Ol pilaia tu i bin gat sans long winim nupela brend Toyota Rush sapos ol i kisim Hole-In-One long namba 18 hole.

Dispela em laspela lek bilong PMs Kopret Golp Salens. Namba wan lek i bin kamap long Lae long 11 Oktoba 2020. Olgeta dispela mani ol i mekim long dispela bung bai ol salim go insait long Tim PNG long Tokyo Olimpik Gems we bai kamap long Tokyo, Japan 23 Julai i go 8 Ogas 2021.

 “Ol taget etlit i bin kam bek pinis long Goroka, bihain long wan wik trening kemp bilong ol. Ol i bin redi long Tokyo Gem maski COVID-19 i bin pasim olgeta rot na tasim olgeta sapot mipela i kisim helpim long ol etlit long kisim Olimpik driman bilong ol,” Rapilla i tok.

Em i tok tenkyu long ol tim husat i bin rejista na husat i go het long sapotim dispela bung long olgeta yia.

Em i tok tenkyu long olgeta kampani husat i sapotim dispela golp salens.