PAPUA Niugini Ragbi Futbal Lig (PNGRFL) Bod i bin tok orait long salim ol PNG Hunters i go stap na trening long   Kwinslan, Australia na redi long 2021 Intrus Super Kap sisen.

Siaman bilong PNGRFL Sandis Tsaka i tok dispela disisen bilong salim ol Hunters go stap long Australia em bihainim tok bilong DFAT na Kwinslan Helt Dipatmen olsem bai i no gat intenesenel balus go kam inap 2021.

Em i tok Praim Minista na Minista bilong Spot, James Marape, i bin tok klia long pablik olsem Gavman bai sapotim ol Hunters long go stap Australia na redi long 2021 Intrus Super Kap. Em i tok sapos  ol i no pilai 2021 Intrus Supa Kap, bai i givim hevi long ol PNG Kumuls long 2021 Wol Kap tu.

Kosa bilong SP Hunters Mathew Church i bin givim pri-sisen trening program pinis long statim trening bilong ol.

“Kosa Mathew Church bai tokaut long wantaim trening skwat namel long ol wik,” Tsaka i tok.