Basketbal Fedaresen bilong Papua Niugini (BFPNG) i wanbel wantaim PNG Olimpik Komisin (PNGOC) long senisim deit bilong trael seleksen na ples bilong pilai.

BFPNG presiden Karo Lelai i tok Nesenel Basketbal sempionsip ol i makim long kamap long Lae long Desemba,  2020 em ol i bin senisim.

Em i tok  bod nau i toktok wantaim PNGOC na ol i wanbel olsem dispela trael seleksen gems bai kamap long ol tripela senta. Ol dispela senta em long Pot Mosbi, Lae na Goroka.

Misis Lelai i tok husat ol pilaia i laik kam pilai long ol dispela senta i mas baim rot bilong ol yet na kamap long ples bilong ol trael gems, tasol ol i mas bihainim Covid-19 lo bilong kantri wantaim.

BFPNG bod nau i wok long sekim list bilong aplikesen bilong ol kosa na tim menesa bilong ol sinia man na meri na   bai bod i mekim anaumen.

Riviu bilong seleksen polisi bilong ol junia na sinia pilaias em  Basketbal Teknikal komisin, Nesenel Kosing Dairekta, FIBA Osenia na BFPNG bod bai tok orait pastaim long givim aut toksave i go long pablik long olgeta i mas save long dispela polisi.

Joseph Dawai i raitim