PAPUA Niugini Olympik Komiti i bin holim wanpela Jenda Ikwiti trening woksop wantaim Osenia Spots Edukesen Program wantaim 25 o 30 spot man na meri long Sir John Guise Stedium long NCD.

Woksop i bin stat long Trinde 21 Oktoba na pinis long Sande 25 Oktoba.

Long las de bilong woksop long Sande, ol lain i stap long trening i bin brukim lain i go long tripela grup na ol i bin pilai ragbi tas gem long bikpela Sir John Guise Race track.

Ol tripela grup em teknikal grup bilong ol gem ofisel na tupela tim; Spoon Fill na Yauroma Catch Mulai.

Lid Fasiliteta bilong Woksop, Alurigo Ravusiro i tok PNGOC i tok ol i laik yusim OSEP pletfom long kamapim toktok long ol dispela samting we i save bagarapim kantri bilong yumi, olsem jenda bes vailens.

Ol i laik toktok long dispela hevi aninit long Osenia Spots Edukesen Program edministresen na kosing program.

“Ol dispela grup i bin stat long Trinde wantaim Jenda Ikwiti wantaim bikpela toktok, ‘Stepping Up’ na mipela gat sampela narapela ol bikpela toktok olsem mekim ol disisen gut na makim gut olgeta grup pipel long kamapim helti rilesensip, maski long ples komyuniti o long spot,” Alurigo Ravusiro, OSEP PNGOC

Wantaim bikpela het toktok bilong ‘Stepping Up’, OSEP fesiliteta i laikim olsem ol lain husat i kisim trening bai go bek wantaim ol save na strongpela tingting bilong sanap na brukim ol banis we save stopim ol grup olsem ol meri na ol disabel insait long spot komyuniti.

Dispela trening em i opim ai bilong planti bilong ol lain husat i bin kisim trening olsem Para Etletik Kosa, Peter Pulu.

Peter Pulu, em wanpela Para Etletik Kosa na Hai Pefomens Spot man i tok bikpela tenkyu long PNG Olimpik Komiti long ogenaisim dispela trening.

Em i tok, dispela trening i opim ai bilong em tru.

Em i luksave long planti rot we ol pipel i save bagarapim ol narapela lain. Moa long ol pipel husat i gat spesel abiliti.

Top Man Skwas etlit, Madako Suari i tok em i lukim dispela olsem wanpela sans long lainim na luksave long ol rot bihainim ol straksa we i stap insait long ol spot long kamapim moa gutpela etlit long bihain taim.

Bihainim bikpela toktok ‘Stepping Up’, ol meri etlit i wok long pilai spot we ol bipo ol man tasol i save pilai olsem boksen na sutim gan.

Ol i kamap olsem lida na edministreta tu.

Bai i gat narapela trening i kamap long stat bilong Desemba 2020.

Nicky Bernard i raitim