MADANG  6B Pirates  i redi long go soim kala bilong ol gen long dispela wiken long Trans Haiwe Ragbi Sevens tonamen we bai kamap long Lae, Morobeprovins.

Dispela Trans Haiwe Sevens  tonamen bai stat long Oktoba 30 long Fraide na pinis long Sande, Novemba 1.

Presiden bilong Madang 6B Pirates klab, Bethany Kauke i tok ol tim bilong em i redi gut na bai promotim Madang provins long dispela nesenel sevens tonamen.

Mis Kauke i givim bikpela tok tenkyu i go long Ramu NiCo Menesmen (MCC) Limited hust i bin helpim tim wantaim K4,500 kes mani long go pilai long Trans HaiweRagbi Sevens Tonamen.

Eksekutiv deputi jeneral menesa bilong RamuNiCo (MCC), Liu Tianhiua i bin givim K4,500 kes mani i go long han bilong Mis Kauke olsem mak bilong helpim Madang  6B Pirates long dispela sevens tonamen.

Madang 6B Pirates tim em planti bilong ol yangpela pilaia husat i no save wok na stap long wod 7 long Nu Taun long Madang taun. Klab i go pas long yusim spots long divelopmen bilong ol dispela yangpela man long helpimol long stap fit na helti.

6B Pirates i gat gutpela rekot stret long kamapim planti gutpela ragbi sevens na 15 pilaia husat i save makim kantri long PNG Pukpuks nesenel tim.

Ms Kauke i tok olgeta yia taim i gat bikpela ragbi tonamen i kamap long ol arapela senta 6B Pirates i save go pas wantaim moa pilaia bilong en i stap long tim long makim Madang.

Madang 6B Pirates i gat rekot long salim ol pilaia i go long PNG Pukpuk tim olsem foma pilaia Arnold Lange, na long nau yet Pukpuks pilaia em Patrick Tatut, nanarapela husat i save opim ai bilong ol nesenel selekta em yangpela stail mangi William Kalai.

Kalai i bin stap wantaim PNG Pukpuks 15 tim husat i bin winim Osenia Ragbi 15s tonamen long lasyia.

Mis Kauke i tok wantaim gutpela sapot bilong MCC em i gat bilip olem Madang 6B Pirates bai i ken salim moa pilaia long makim kantri insait long PNG Pukpuks nesenel tim.

James G. Kila i raitim