HOHOLA Flies meri i bin autim tiket bilong ol South’s meri long las wik Sande long Nesenel Fubtal Stedium fil tu long Pot Mosbi.

Dispela Pot Mosbi Ragbi Futbal Lig kompetisen i bin stat foapela wik i go pinis we Hohola Flies meri i bin fofitim 3-pela taim ol narapela meri tim wantaim fri 2 poin na long las wiken raun ol brukim bun wantaim Souths meri.

Souths i bin putim namba wan trai insait long 2 minits bilong namba wan hap bilong gem na pasim maus bilong ol Flies tasol dispela i no bin daunim ol Flies long namba tu hap bilong gem we Hap bek bilong Flies husat i bin katim difens wantaim namba wan trai tasol kik i bin abrus.

Long namba tu hap bilong gem na Souths givim sans penalti gol long Flies, taim Eshvin Kaiat husat i save pilai senta bilong PNG Okid i bin kikim dispela penalti gol na apim skoa 6-4.

Flies tim i gat planti nupela pilaia husat i bin joinim tim long salensim ol Souths meri we i gat planti ol ekspriens pilaia na i bin givim moa strong long ol Flies long daunim ol wantaim 2-pela poin.

Long nambawan hap bilong gem klostu Souths autim Flies tasol ol i bin asua na givim sans long Flies wantaim 2-pela penalti gol.

Tupela tim wantaim sindaun long wankain poin we kik bilong tupela wantaim i bin abrus tasol laki bilong Flies long penalti kik na mekim ol autim Souths.

Jacklyn Kimala i raitim