WANPELA Lokal Touch Footy resis i bin stat long dispela mun Septemba we i save bungim olgeta liklik pikinini bilong Hohola long pilai wantaim.

“Dispela resis i bin stat long las yia wantaim ol mangi bilong Hohola 2 tasol nau dispela yia 2020, em olgeta Hohola mangi i bin rejista na resis wantaim,” Gabriel Yanis husat i statim i bin tokim Wantok Niuspepa.

“Mi bin statim dispela Touch Footy resis long pulim tingting bilong ol yangpela mangi long no ken mekim pasin no gut na kam pilai long winim prais mani wantaim trofi,” Yanis i tok.

Em i tok dispela resis em kamap long tingting bilong em yet wantaim hatwok bilong em long mekim olgeta mangi bai i ken gro wantaim skil bilong Touch Footy.

“Planti ol skul mangi i save pilai wantaim ol bikpela mangi tu bikos em sans mani bilong ol na trofi tu,” em i tok.

“Olgeta tim i save rejista wantaim K5 pastaim bihain long kisim fil na salens bikos ol bai yusim dispela ol mani long givim prais gen long pinis bilong gem,” em i tok.

Em i welkamim ol sponsa husat i tingting long divelopmen bilong ol yangepla mangi na laik sapotim em long bringim dispela wok bilong em i go moa.

“Dispela gem i no bilong amamas na winim prais tasol em bilong divelopim ol yangpela long gem skil tu we ol i ken save moa na bihain ol bai isi long bikpela seleksen,” em i tok.

“Mi gat plen olsem sapos dispela gem i karim kaikai, em bai mipela lukluk fowat long ol bikpela kompetisen we ol yangpela i ken gat sans long ol bikpela resis,” em i tok.

 “Mipela i luk fowat long neks yia we ol Hohola mangi i ken go salensim ol narapela Sabeb ples insait long Siti sapos mipela i orait wantaim mani na sapot,” em i tok.

Em i tok bikpela tenkyu long olgeta pikinini husat i save kamap long olgeta Sarere na pilai wantaim.

Jacklyn Kimala i raitim