NCD Moni plus POM Vipers i bin nilim difending sempien Lae Snax Tigers taim Kroton Hela Wigmen i bin daunim balens bilong PRK Gulf Isou long las wik Sande long Sir John Guise Stedium.

Long raun 11 bilong Digicel Kap kompetisen i bin gat tripela Heda gem namel long Wigmen salensim Isou, Gurias salensim Tumbe na Vipers salensim Tigers.

Olgeta sapota i bin kamap long lukim tripela heda resis bihain long COVID-19 lokdaun.

Gem bilong olgeta tim i bin strong tumas bikos olgeta i resis long iliminesen fainel we bai kamap long dispela wik Sande long Pot Mosbi.

Difending Sempien Lae Tigers i bin asua long fil na givim sans long Vipers long nilim ol wantaim 7-0. Long wankain taim Gurias rausim ol Tumbe 20-14 klostu tupela dro na bihain em Wigmen daunim balens bilong Isou 28-20.

Ol wina tim husat bai resis long top 6 iliminesen fainel em Mioks bai resis wantaim Wigmen na bihain em Muruks bai resis wantaim Vipers taim Tigers na Gurias bai kisim malolo.

Tupela wina tim bilong eliminesen fainel bai resis long Pri-limineri fainel neks wik long wankain taim. Bihain em bai tupela top tim Gurias na Tigers bai resis.

Jacklyn Kimala i raitim