OLPELA Goroka Grammar Skul sumatin Leonie Beu i bin go long Siti bilong Concordia long Kanas USA long las wik Trinde long kisim Etletik Skolasip long Cloud Kantri Komyuniti Kolis (CCCC).

Leonie i gat 22 krimas na em bilong Sappa ples long Huon Distrik long Morobe Provins. Em i bin winim ol medol long olgeta tripela ran bilong em long Pasifik Gem long las yia we em i bin winim Gol long 4x400m resis na silava long 4x100m.

Em i bin win long dispela seken 55.71 insait long 400m we i bin kisim tingting bilong ol Kosa long USA Kolis na Beu i bin kisim skolasip bilong Cloud Kantri we bai karamapim ful tusen fi bilong em na givim liklik mani tu wantaim. Bihain long pinisim Gret 10 bilong em long Busu Sekenderi long Lae, Beu i bin go antap long NSI Goroka long 2018 long joinim ol Etletik skwat na redi long Pasifik Gem aninit long kosa Dior Lowry. 

Presiden bilong Etletik PNG Tony Green i bin tok tenkyu long Dairekta bilong Goroka Grammar Paddy Kelly long sapotim skul fi bilong Leonie na Simbai Kasparto i pinisim edukesen taim redi long Gem.

Beu bai joinim longpela taim trening patna bilong em Isila Apkup bilong Waskuk ples Ambunti.

Tupela i bin trening wantaim stat long 2017 taim Apkup i bin go stap long Lae long pinisim sekenderi edukesen. Ol i bin kisim em long 2014 PNG Gem taim em i bin pinis namba 3 long 400m, dispela taim i bin bikpela taim bilong 15 yia krimas spot meri long 61.83 seken.