LAE City Toti FC i lukluk nau long kisim Maina Primia bilong Kumul Petroleum Nesenel Soka Lig long dispela wiken gem taim ol bungim Vitiaz Yunaitet long PNG Stedium long Pot Mosbi.

Toti Bisket sponsa tim bilong Lae i go pas long poin leta bilong Nesenel Soka Lig, tasol dispela gem wantaim Vitiaz FC em bai wanpela strongpela resis.

Lae Siti FC i bin winim gem bilong ol las wiken taim ol i bin bungim Star Mountain FC. Star Mountain i bin strongim difens bilong ol na i no givim sans long ol Lae FC long winim ol isi. Tupela wantaim i pilai strong inap Lae FC i bin skorim gol insait long las tripela minit na winim ol Star Mountain 2-1.

Long namba wan hap bilong gem long Pot Mosbi Hekari i win na Vitiaz i lus long Komara 1-0 na Lae Siti FC i winim Star Mountain 2-1. Ol gem long Lae, FC Bogenvil i bin dro wantaim Kutubu na Tusbab FC 0-0.

Dispela wiken bai Toti kam bek long Mosbi long bungim Vitiaz. Dispela gem bai wanpela strongpela gem, Vitiaz i stap long nambawan tu ples long lata tasol i lus long las wiken wantaim Gulf Komara, na ol suruk kam daun long namba tri ples.

Narapela tupela gem long Mosbi bai lukim FC Bogenvil bai bungim FC Morobe Wawens. Bogenvil i wok long winim ol gem bilong ol taim ol kisim bek olpela kosa bilong ol na dispela i mekim bikpela senis long tim.

Lae bai holim tupela gem namel long ol Tusbab FC na Hekari na Kutubu bai bungim pilai bipo long ol go insait long ol fainel bilong Kumul Petrolium Nesenel Soka Lig top faiv.

Nicky Bernard i raitim