WANPELA Lokal volibal resis i save kamap long olgeta Sande i bai pilaia fainels bilong ol long dispela wik Sande.

Dispela resis i bin stat 3-pela Sande i go pinis na dispela Sande em bai ol pilai fainel long lukim husat ol tim bilong man na meri bai winim gren fainel wantaim prais mani K10, 000.

Ol bai skelim prais mani namel long foapela top tim husat i stap long namba wan, tu, tri na foa ples bihain long gren fainel long Septemba 16, 2020.

Dispela resis i bin makim Independens De bilong PNG 16 Septemba, 2020 long pilai gren fainel na winim prais mani wantaim long selebretim specel de bilong PNG.

Planti Enga tim bilong man na meri wantaim i bin resis wantaim foapela ol nambis tim. Ol bai skelim mani namel long olgeta tim husat i stap antap.

Insait long las tripela raun bilong volibal resis no gat wanpela hevi i bin bagarapim gem bikos olgeta tim i wanbel na amamas long winim sans mani we wanpela lida man bilong Enga i putim.

Maski san i kukim ol pilaia tasol olgeta i amamas long pilai na resis wantaim. Dispela gem i no hatwok olsem ragbi o soka we bai ol ranim bal, volibal em wok bilong han long paitim bal.

Long wankain taim olgeta tim i bai amamas wantaim long selebretim Septemba 16, 2020 wantaim ol wantok, famili, pren na ol arapela husat i go pas long lukautim dispela lokal resis.

Jacklyn Kimala i raitim