WANPELA PNG Okid pilaia Eshvin Kaiat husat i save pilai senta bilong PNG Okids i joinim ol Hohola Flies tim long dispela 2020 PRL sisen.

“Mi save laik long pilai wantaim ol meri husat i no save long ragbi na nupela long tim,” Eshwin i tok.

“No ken ting olsem mi save pilai long PNG Okid o bikpela gem na yupela pret long kam toktok wantaim mi, bikpela samting em mi laik divelopim dispela ragbi skil long wan wan pilaia bilong klab,” em i tok.

Em i bin salensim ol nupela pilaia bilong Hohola Flies klab long kam kisim fitnes trening bikos dispela i ken givim moa strong long taim bilong gem namel long fil.

“Mipela i mas wok bung wantaim long ragbi gem bikos em bodi kontek gem na sapos mipela i no kisim gutepla trening em bai mipela bagarapim gem na bodi wantaim,” em i tok.

Em i tok bikpela samting em givim moa taim long fitnes na daunim yumi yet long taim bilong resis.

“Mi laikim yumi olgeta tim i mas bungim wanpela tingting wantaim, harem tok na rispektim narapela long taim bilong gem insait na ausait long fil,” em i tok.

“Maski mi save pilai long PNG Okids tasol mi gat planti wok i stap long mekim  na painim hap insait long ol bikpela intenesenel gem olsem na yumi olgeta i mas wok olsem tim long winim olgeta gem,” em i tok.

Olgeta wankain tim na meri bai resis long dispela sisen, olsem na sapos yumi laik winim gem em yumi mas pilai isi  na harem tok.

Jacklyn Kimala i raitim