BOGENVIL FC i kam bek strong long namba tu hap long winim pilai bilong ol wantaim ol Morobe United 3-0 long tripela gem bilong Nesenel Soka Lig long PNG Futbol Stedium long Pot Mosbi long las wiken.

Bogenvil FC i no pilai gut long namba wan hap tasol ol bek lain bilong ol strongim banis bilong ol gut tru we ol Morobe United i painim hat long brukim banis bilong ol.

Tupela tim wantaim i mekim wankain pilai long namba wan hap we tupela tim i hat long painim net bilong tupela.

Ol boi bilong Morobe United i mekim planti ol longpela kik tasol i no painim gol mak bilong Bogenvil FC.

Tupela tim i go malolo wantaim ol 0-0 long hap taim. Bogenvil FC i kam bek wantaim narapela stail pilai taim ol harim toktok bilong kosa bilong ol Pasam long senisim pilai long midfil. Dispela i mekim ol boi bilong i opim banis bilong ol Morobe United Basil Jufari i go skoaim namba wan gol bilong ol Bogenvil. Kepten bilong Abel Redenut, i go skoa gen long wanpela kona kik long bringim skoa bilong Bogenvil FC go 2-0 na bipo long pilai pinis Jufari i go skoa gen long bringim skoa bilong ol go 3-0.

Long Raun 15 long dispela wiken FC Bogenvil bai bungim ol boi bilong Tusbab Stallion FC long Pot Mosbi na Morobe United bai bungim Star Mountain FC long Lae.

Ol narapela gem long raun 15 bai lukim Hekari United bai bungim Gulf Komara FC long Pot Mosbi na narapela gem tu long Pot Mosbi bai lukim Vitiaz United bai bungim Kutubu FC na long Lae, Morobe Wawens bai bungim sempion Lae City FC.

Nicky Bernard i raitim