SAUT Pasifik Brewery wantaim SP Lager Brand i bin sapotim Oil Search Nesenel Futbal Stedium (OSNFS) long 2020 yia long Pot Mosbi.

Dispela komitmen bilong SP Brewery i soim olsem sapot bilong ol em bai stap wantaim OSNFS maski COVID-19 pandemik i bin stopim Kwinslen Intras Supa Kap.

SP Brewery i bin namba wan sponsa bilong ragbi lig long bipo kam inap nau, olsem na ol bai go het long sapotim 2020 yia wankain olsem ol las yia.

SPB Komesel Menesa Moses Williams i tok SP Lager i bin baim 50 pesen bilong wanpela yia komitmen long NFS maski ino gat tru sisen bilong gem tasol ol sanap strong wantaim Kampani long wok wantaim ol kastoma long gro wantaim.

“Dispela patnasip bilong mipela em ai strongim rilesensip wantaim PNGRFL na SP Hunters long 2019 mipela i i bin sainim agrimen long sapotim ragbi lig long kantri,” em i tok.

Em i tok dispela sapot bilong givim moa strong long ol ragbi lig sapota na tu long givim sans long ol SP Hunters long kisim wol klas ekspriens na sapotim rabgi lig kompetisen.

SPB i bin tokaut long dispela disisen long 1 Septemba, 2020 olsem ol tingim agrimen bilong ol wantaim PNGRFL maski COVID-19 lok daun tasol sapot bilong 2020 mas go yet.

Jacklyn Kimala i raitim