NESENEL Spoting Institut (NSI) fil long Goroka Isten Hailens bai no inap moa holim 2020 Digicel Kap gem bikos long wanpela bagarap i bin kamap bihain long pilai namel long Goroka Lahanis na Snax Tigers long las wik Sande.

 Dispela em bikpela asua bilong ol Goroka pipel long luksave na no ken mekim dispela kain pasin gen.

Menesa bilong PNG Nesenel Ragbi Lig Kompetisen (NRLC) Stanley Hondina i tok ol sapota i no bin wanbel long stap ausait olsem ol i bin kukim daun kunai geit haus bilong NSI na go insait long fil long raun 8 bilong Digicel Kap resis namel long Tigers na Lahanis.

 “Aninit long protokol bilong COVID-19 ol i bin kisim 500 sapota tasol i go insait long geit long lukim namba wan gem bilong dispela 2020 sisen,” Hondina i tok.

 Dispela i bin mekim ol arapela sapota husat i no go insait long lukim gem olsem na 10 minit bilong namba tu hap, ol i bin rausim mein geit na arapela hap bilong ol banis long go insait lukim gem.

 Em i tok ol polis i bin kamap long kontrolim gem wantaim protokols bilong COVID-19 tasol ol liklik namba bikos namba bilong sapota em moa long polis.

 “Bihain long dispela bagarap i bin kamap mipela i bin sindaun na toktok long dispela na Lahanis menesmen i wanbel long baim dispela bagarap i bin kamap long NSI,” Hondina i tok.

 Em i tok long Minj gem olgeta sapota i bihainim protokol na 600 sapota tasol i bin go insait na ol rausim ol arapela sapota long dispela namba wan gem namel long Tumbe na Eagles, dispela i bin givim gutpela ripot long Waghi Tumbe olsem ol bai gat sans long holim narapela moa gem 2020 sisen.