WANPELA Lida man bilong Enga Provins (Wabag) Jacky Kangu i bin putim K10, 000 prais mani bilong ol Enga manmeri husat i stap long Pot Mosbi long pilai volibal gem.

Dispela volibal resis i bin stat long las wik Sande na bai go het inap olgeta raun bilong volibal resis i pinis na skelim mani long namba wan wina, tu na tri wina long tim bilong man na meri wantaim.

Long las wik Sande em namba wan raun bilong resis we i skelim husat ol tim i rejista pinis na husat tim i no yet. Na em kamap long Mosbi Saut.

Jacky Kangu i laik bungim olgeta pipel bilong em wantaim amamas na pilai gem bikos dispela em wanpela rot bilong luksave long narapela wantaim wanpela Enga Tok Ples  ‘Engalish’.

“Mipela i laik pilai long amamas wantaim na strongim Enga pasin long dispela kain pilai, olsem na bikpela tenkyu long lida man Jacky Kangu long tingim mipela na putim kain prais mani,” wanpela lida bilong gem i tok.

“Dispela i no bilong pilai na winim Awot bilong intenesenel mak tasol em bilong luksave long mipela yet olsem wanpela famili,” em i tok.

Bihain long olgeta raun bilong volibal resis ol bai skelim prais mani, i go long wina bilong tim bilong ol man na meri wantaim.

Jacklyn Kimala i raitim