Minj long Jiwaka na Goroka long Isten Hailens Provins bai holim dispela wiken Raun 8 Digicel Kap resis. Na sapos tupela fil wantaim bihainim Banis Protokol, em Kimbe long Wes Nu Briten tu bai i gat sans long lukim Cutter sait long hom gem bihain long sisen pinis.
Menesa bilong PNG Nesenel Ragbi Lig Kompetisen (NRLC) Stanley Hondina i tok salens nau i stap long Minj na Goroka long givim gutpela kwaliti ragbi lig gem.
Long Sarere , JPG Waghi Tumbe bai holim Wamp Nga Mt Hagen Eagles long John Ambane oval na long Sande primia Snax Tigers bai go resis long Goroka long salensim Bingtangor Goroka Lahanis long Nesenel Spot Institut. Gem bai stat long tupela de long 2 klok apinun.
Tiket prais, bai ol salim bihainim namba bilong ol sapota bihain long gem stat.
“Mi bai go raun lukim Minj na Goroka long menesim na bihainim olgeta protokol gut,” Hondina i tok. “Bihain long yusim dispela ol fil, mipela bai lukim sapos ol inap long holim wanpela o tupela moa gem na givim sans long ol Kimbe long 3-pela raun bilong 2020 sisen primia kompetisen.”
Em i tok tenkyu long Agmark Rabaul Gurias menesmen na Kalabond wok manmeri long Kokopo long holim gut dispela namba wan gem ausait long Pot Mosbi na Lae las wiken. “Yu na ol arapela pipel bilong Is Nu Briten i bin putim gutpela han mak long ol arapela Frensais na provins long bihainim,” Hondina i tok.
Em i toksave long olgeta stekholda wantaim Frensais menesmen, opisal na pilaia long go het long bihainim protokol.
Hondina i tok ol i no kisim tok orait yet bilong Kontrola bilong Nesenel Pendmeik Opis na PNG Spot Faundesen olsem ol sapota bai kam lukim gem long Pot Mosbi.
Ol 2020 Digicel Kap Raun8 Dro em;
Sarere Ogas 29, 2020 long John Ambane oval, Minj
2.00 pm – JPG Waghi Tumbe vs WAMP Nga Mt Hagen Eagles
Sande Ogas 30, 2020 long NSI, Goroka
- pm - Bintangor Goroka Lahanis vs Lae Snax Tigers
Sande Ogas 30, 2020 long Lae Ragbi Lig graun – Double Heda
1.00 pm - PRK Mendi Muruks vs PRK Gulf Isou
- m - EPG Enga Mioks vs Kimbe Cutters
Sande 30, 2020 long Sir John Guise Stedium, Pot Mosbi – Double Heda
1.00 pm - Kroton Hela Wigmen vs Gas Risos Ltd Central Dabaris
3.15 pm – Moni Plus NCDC POM Vipers vs Agmark Rabaul Gurias
wantokniuspepa.com