Tubsbab Stallion FC i pundaun long ol boi bilong Vitiaz FC 5-3 long namba tu gem long PNG Futbal Stedium long Pot Mosbi long raun 13 bilong Kumul Petroleum nesenel soka lig.

Pot Mosbi i bin holim tripela gem long raun 13. Namba wan gem i bin stap namel long Gulf Komara na Morobe United na Komara i bin winim pilai 2-1.

Stallion wantaim Vitiaz i bin statim gem bilong ol long 3pm we i lukim Vitiaz i bagarapim tru ol yangpela bilong Madang 5-3.

Stallion i no gat planti ol ekspiriens pilaia tasol ol i bin pilai gut tru long holim ol biknem tim long NSL.

Vitiaz FC i bin dro long las wiken gem na ol drop liklik i kam daun long poin lata na dispela bikpela win bilong ol i bringim ol go antap gen long poin lata.

Long mein gem long PNG Futbal Stedium em tupelo susa tim namel long Kutubu FC na Hekari United FC. Dispela pilai em bikpela susa Hekari i bagarapim tru susa bilong ol wantaim 7-0.

Hekari i bin lus long sempion tim Lae City FC 1-0 long las wiken na dispela wiken ol kam gut tru wantaim bikpela win long strongim ol gen poin lata.

Nicky Bernard i raitim