LONG raun 14 long dispela wiken Pot Mosbi bai i holim tripela gem gen.

Namba wan gem bai i stap namel long Hekari United FC na Vitiaz FC. Hekari na Vitiaz i bin winim gem bilong ol las wiken wantaim ol bikpela skoa na tupelo tim wantaim bai pait long namba tu ples long poin lata. Vitiaz FC i no gat planti ekspiriens pilaia tasol difens bilong ol bai i ken winim gem bilong ol.

Namba tu gem long PNG Futbal Stedium bai lukim FC Bogenvil bai traim ol boi long Morobe United. FC Bogenvil i lus bikpela long Lae City long Lae las wiken na dispela gem bai ol putim olgeta strong bilong ol long winim. Morobe United i lus las wiken long ol Komara FC na dispela gem bai stap long het bilong ol long win.

Long las gem bai lukim Galf Komara bai bungim ol boi bilong Morobe Wawens. Tupela tim wantaim i winim pilai bilong ol las wiken. Komara i gat gutpela difens na sapos dispela difens bilong ol i wok gut long dispela wiken bai kamap wantaim 2 poins.

Narapela tupela gem bai i kamap long Lae namel long Lae City na Kutubu na Tusbab Stallion FC na Star Mountain FC.

Nicky Bernard i raitim